Чорабинии бошукӯҳ ба ифтихори Рӯзи таъсисёбии Қувваҳои мусаллаҳи Ҷумҳурии Тоҷикистон дар ДБССТ
20 феврали соли 2025 дар доираи таҷлили Рӯзи таъсисёбии Қувваҳои Мусаллаҳи Ҷумҳурии Тоҷикистон, дар Донишгоҳи байналмилалии сайёҳӣ ва соҳибкории Тоҷикистон ҳамоиши тантанавии фарҳангӣ баргузор гардид.
Чорабинӣ бо сухани ифтитоҳӣ ва табрикотии ректори Донишгоҳ, профессор Асрорзода Убайдулло Саттор оғоз ёфт. Ӯ ҳозирин, афсарону сарбозони мамлакатро ба ифтихори ин санаи таърихӣ самимона муборакбод намуда, Рӯзи таъсисёбии Қувваҳои Мусаллаҳро рамзи далериву шуҷоат ва ифтихори миллӣ арзёбӣ кард.
Дар рафти суханронӣ саҳми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ муҳтарам Эмомалӣ Раҳмон дар ташаккул ва таҳкими Қувваҳои Мусаллаҳи кишвар махсус таъкид гардид.
Қайд гардид, ки бо ҳидоят ва сиёсати хирадмандонаи Пешвои миллат Қувваҳои Мусаллаҳ ба як сохтори боэътимоди ҳифзи амнияти давлатӣ ва суботи миллӣ табдил ёфтаанд.
Таъкид гардид, ки Қувваҳои Мусаллаҳи кишвар дар ҳифзи оромӣ, сулҳу субот ва таъмини рушди давлат нақши калидӣ доранд. Меҳнати пуршарафи афсарону сарбозон, ки бо садоқату масъулияти баланд дар ҳифзи марзу буми Ватан саҳм мегузоранд, шоистаи арҷгузорӣ мебошад.
Ректори донишгоҳ профессор Асрорзода Убайдулло Саттор бо ифтихор иброз дошт, ки бо дастгирии Ҳукумати Ҷумҳурии Тоҷикистон дар Донишгоҳи байналмилалии сайёҳӣ ва соҳибкории Тоҷикистон кафедраи ҳарбӣ таъсис дода шудааст. Ҳадафи он тайёр намудани мутахассисони соҳибихтисос ва ватандӯст барои хизмат дар сафи Қувваҳои Мусаллаҳ мебошад. Барномаҳои таълимии кафедра бо дарназардошти талаботи Қувваҳои Мусаллаҳ таҳия гардида, ба тарбияи ҷавонон дар рӯҳияи ватандӯстӣ ва омодагӣ ба хизмат равона шудаанд.
Дар идомаи чорабинӣ бахши фарҳангии Донишгоҳ ва ҳунармандони маъруфи кишвар бо барномаи консертӣ табъи ҳозиринро болида гардониданд.
Ҳамзамон, кормандони кафедраи ҳарбӣ ба ифтихори 32-юмин солгарди таъсисёбии Қувваҳои Мусаллаҳ бо Сипосномаҳо ва мукофотҳои пулӣ қадрдонӣ гардиданд.
