ОЛИМПИАДАИ МИНТАҚАВИИ ХОНАНДАГОН БАРОИ ДАРЁФТИ “ҶОМИ РАЁСАТИ ДБССТ” ОҒОЗ ГАРДИД

02 апрели соли 2025 дар Литсейи касбии хизмати шаҳри Хуҷанди назди Донишгоҳи байналмилалии сайёҳӣ ва соҳибкории Тоҷикистон Олимпиадаи минтақавии хонандагони синфҳои 9 ва 11-и муассисаҳои таҳсилоти миёнаи асосӣ, умумӣ ва ибтидоии касбии шаҳру ноҳияҳои вилояти Суғд аз рӯйи фанҳои математика, физика, химия, биология, технологияҳои иттилоотӣ ва география барои дарёфти “Ҷоми раёсати Донишгоҳи байналмилалии сайёҳӣ ва соҳибкории Тоҷикистон” оғоз гардид.
Дар ин олимпиада, ки бо мақсади рушди малакаҳои зеҳнӣ ва тақвияти дониши хонандагон доир мегардад, беш аз 200 нафар хонанда аз 18 шаҳру ноҳияҳои вилояти Суғд иштирок доранд. Роҳбарияти Донишгоҳи байналмилалии сайёҳӣ ва соҳибкории Тоҷикистон ҳозиринро бо самимият хайрамақдам гуфта, барои иштироки фаъолонаи онҳо изҳори сипос намуд.
Зимни суханронии худ, роҳбарияти донишгоҳ миннатдории худро ба Ҳукумати Ҷумҳурии Тоҷикистон, Мақомоти иҷроияи ҳокимияти давлатии вилояти Суғд, Вазорати маориф ва илми Ҷумҳурии Тоҷикистон ва дигар ниҳодҳои марбута барои дастгирии баргузории ин олимпиада баён дошт.
Олимпиадаҳои фаннӣ воситаи муҳим барои ташаккули қобилиятҳои таҳлилӣ ва эҷодии хонандагон ба шумор рафта, дар доираи “Бистсолаи омӯзиш ва рушди фанҳои табиатшиносӣ, дақиқ ва риёзӣ” Донишгоҳи байналмилалии сайёҳӣ ва соҳибкории Тоҷикистон пайваста барои рушди истеъдодҳои ҷавон шароити мусоид фароҳам меорад.
Ҳадафи асосии олимпиада баланд бардоштани шавқу рағбати хонандагон ба илмҳои дақиқ ва табиатшиносӣ, таҳкими дониш ва омодасозии онҳо барои саҳмгузорӣ дар пешрафти илм ва иқтисодиёти кишвар мебошад.
Раёсати донишгоҳ изҳори итминон намуд, ки ин олимпиада заминаи устувор барои таҳкими донишу маҳорати иштирокчиён гузошта, онҳоро дар оянда ҳамчун муҳаққиқони соҳибистеъдод ва мутахассисони арзанда ба ҷомеа пешниҳод хоҳад кард.
ш. Хуҷанд, 02.04.2025

Leave a Reply

Your email address will not be published. Required fields are marked *